VENEZUELË | PRESIDENTJA E PËRKOHSHME E VENEZUELËS DELSI (DELCY) RODRIGUEZ: U LIRUAN 500 TË BURGOSUR POLITIKË.

Karakas, Venezuelë | Presidentja e përkohshme e Venezuelës, Delsi (Delcy) Rodriguez, njoftoi se numri i të burgosurve politikë që do të lirohen jashtë mekanizmit të amnistisë do të kalojë 500 në orët e ardhshme dhe se 395 lirime janë kryer tashmë ditët e fundit.

“E di që do të tejkalojmë 500 lirime në orët e ardhshme”, tha ajo në një fjalim të transmetuar të premten nga transmetuesi shtetëror “VTV”.

Presidentja e përkohshme Rodriguez sqaroi më pas se këto lirime nuk mbulohen nga amnistia e miratuar shkurtin e kaluar, por se është krijuar një mekanizëm alternativ për ata që nuk kualifikoheshin.

“Ata që nuk mundën ose nuk kualifikoheshin për Ligjin e Amnistisë ndoqën një rrugë të ndryshme përmes Komisionit për Revolucionin Gjyqësor, Programit të Bashkëjetesës dhe konsultimeve të ndryshme me universitete dhe organizata joqeveritare”, tha ajo.

Sipas asaj që njoftoi qeveria javën e kaluar, përfituesit përfshijnë të moshuarit, të miturit, gratë shtatzëna ose ato që ushqejnë me gji dhe të burgosurit me probleme shëndetësore.

Ndër rastet e cituara janë disa oficerë të Policisë Metropolitane të arrestuar për ngjarjet e prillit 2002, gjatë grushtit të dështuar të shtetit kundër Hugo Çavez (Chávez).

Presidentja e përkohshme Rodriguez pohoi gjithashtu lirimin e gjashtëmbëdhjetëvjeçares Samantha Hernandez dhe Meri (Merys) Torres, nënës së Kapiten Antonio Sekuea (Sequea).

Në të njëjtën kohë, Presidentja e përkohshme Rodriguez njoftoi gjithashtu nisjen e një konsultimi publik mbi reformën e drejtësisë penale, të hapur për të gjithë sektorët e shoqërisë civile, për 1 qershor, duke theksuar se transformimi i sistemit gjyqësor do t'i japë përparësi adresimit të vonesave procedurale dhe luftimit të korrupsionit.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit