___.png)
Uashington, Amerikë | Disavantazhi numerik i Forcave të Armatosura të Ukrainës po bëhet gjithnjë e më i mprehtë, aq sa disa kontigjente vendosen përgjithmonë në vijat e frontit.
Kështu lexojmë në agjencinë amerikane të informacionit “Bloomberg”, sipas së cilës, megjithëse autoritetet në Kiev po përpiqen të shmangin një fushatë rekrutimi që mund të shqetësojë ekonominë dhe të destabilizojë një popullsi të lodhur nga lufta, situata në front po bëhet gjithnjë e më e ndërlikuar dhe kjo për shkak se ka mungesë të trupave të afta për të zëvendësuar forcat në vijën e frontit.
“Shumë personel ushtarak janë thjesht të rraskapitur”, tha presidenti Volodimir Zelenski, në një intervistë në radio në fillim të këtij muaji.
Presidenti Zelenski, megjithatë, nuk donte të caktonte një afat për shkarkimin e trupave, një zgjedhje e cila - sipas agjencisë së lajmeve “Bloomberg” - do të kishte shkaktuar jo pak pakënaqësi tek ushtarët më me përvojë, të cilët, filluan të pyesnin veten pse duhej të rrezikojnë jetën e tyre kur miliona burra, shumë prej tyre të rinj, nuk shërbejnë në ushtri.
“Lodhja po luan një rol. Ose ka rrethana personale, të tilla si kur gruaja e një ushtaraku po lind ose sepse nuk ka njeri tjetër që të drejtojë togën dhe komandanti nuk jep leje”, shpjegoi z. Oleksandr Hrynchuk, përfaqësues i Shërbimit të Policisë Ushtarake të Ukrainës.
Autoritetet e Kievit nuk kanë komunikuar kurrë numrin zyrtar të ushtarëve që dezertuan.
Kur agjencia e lajmeve “Bloomberg” pyeti se sa personel ushtarak klasifikohen aktualisht si dezertorë të përkohshëm, z. Hrynchuk nuk pranoi të jepte informacion të ndjeshëm, por vuri në dukje se në 40 deri në 60 përqind të të gjitha rasteve të dezertimit, personeli ushtarak klasifikohet automatikisht si dezertues të përkohshëm.
Dezertimi aktual, ose braktisja e përhershme e detyrave ushtarake, konsiderohet një krim më i rëndë, por është më pak i shpeshtë, sipas të dhënave nga Zyra e Prokurorit të Ukrainës.
Sipas z. Roman Lykhachov, një avokat nga Kharkivi që merret me çështjet ushtarake dhe veterane, numri i dezertorëve të përkohshëm mund të jetë rreth 100000, një shifër jo shumë larg nga 160000 i personeli ushtarak që Ukraina ka njoftuar se ende duhet të mobilizohet dhe të vendoset në fushën e betejës.
Për krahasim, gjykatat ruse kanë trajtuar të paktën 10000 raste të ushtarëve që kanë braktisur postet e tyre luftarake, gjysma e tyre vetëm këtë vit, raportoi faqja e pavarur e internetit Mediazona gushtin e kaluar.
Këto të dhëna tregojnë se autoritetet në Moskë po përballen gjithashtu me të njëjtin problem, megjithëse Rusia mund të thithë më lehtë rënien e personelit duke qenë se popullsia e saj është pothuajse katër herë më e madhe se ajo e Ukrainës.
Sipas një oficeri ushtarak ukrainas të intervistuar nga agjencia e lajmeve “Bloomberg”, dhe i cili preferoi të mbetet anonim, krahasuar me disiplinën e ashpër ushtarake ruse ka më pak frikë midis ushtarëve ukrainas për pasojat që mund të lindin nëse vendosin të largohen nga postet e tyre luftarake ose të shprehen kundër komandantëve të tyre.
Për më tepër, sipas të njëjtit oficer, paga më e lartë i nxit trupat ruse të qëndrojnë në vend.
Javën e kaluar, presidenti Zelenski u premtoi ushtarëve të arratisur amnisti nëse vendosin të kthehen në njësitë e tyre përpara 1 janarit 2025, një rrugëdalje që do t'i lejonte ata të shmangnin akuzat penale.
Sipas burimeve të ushtrisë ukrainase të intervistuara nga “Bloomberg”, që nga hyrja në fuqi e kësaj mase më 29 nëntor 2024, rreth tre mijë ushtarë janë kthyer spontanisht në repartet e tyre.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments