TURQI: MBI 400 TË ARRESTUAR GJATË TUBIMIT TË 1 MAJIT NË STAMBOLL.

Stamboll, Turqi | “Më shumë se 400 veta që morën pjesë në festimet e 1 majit u arrestuan sot (01.05.2025) në Stamboll, ku një pjesë e qytetit është paralizuar për të parandaluar tubimet në sheshin ikonik Taksim”, raportoi dega e Stambollit e Shoqatës së Avokatëve Progresivë (CHD).

Numri i të arrestuarve tejkalon 400.

Autoritetet nuk dhanë detaje. Arrestimet u kryen në lagjet Beshiktash (Besiktas) dhe Mecidiyeköy në pjesën evropiane të qytetit, ku policia bllokoi rrugët që të çonin në sheshin Taksim.

Me pak përjashtime, tubimet janë të ndaluara në këtë bulevard të gjerë bregdetar, skenë e betejave të rëndësishme për demokraci në të kaluarën, që kur protestat që filluan në Parkun Gezi aty pranë tronditën qeverinë në vitin 2013.

Ashtu si në vitet e kaluara, policia e kishte bllokuar sheshin për disa ditë.

Amnesty International të mërkurën (30.04.2025) denoncoi arrestimin e më shumë se 100 personave përpara Ditës së 1 majit në Turqi, duke u kërkuar autoriteteve të heqin ndalimin e demonstratave në sheshin Taksim.

Disa mijëra njerëz arritën të mblidheshin sot në dy zona në sektorin aziatik të qytetit me kërkesë të sindikatave, sipas pamjeve nga mediat turke dhe një kameraman i agjencisë së lajmeve “AFP”.

“Sheshi Taksim duhet të rimarrë nga ky regjim shtypës”, tha z. Ozgur Ozel, udhëheqës i Partisë Republikane Popullore (CHP-Social Demokratët), forca kryesore opozitare, në një nga tubimet.

Stambolli ishte skena e protestave të mëdha në fund të marsit, në një shkallë të paparë që nga viti 2013, pas arrestimit të kryetarit të bashkisë së opozitës së qytetit, Ekrem Imamoglu, kundërshtari kryesor politik i Rexhep Tajip Erdogan.

Sipas autoriteteve, gati 2000 persona u arrestuan për pjesëmarrje në demonstrata të ndaluara.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit