___.png)
Pizë, Itali | Një studiues italian beson se ai ka identifikuar vendndodhjen e varrosjes së Platonit në Athinë duke analizuar papiruset nga Herculaneum.
Sipas hulumtimit, të udhëhequr nga papirologu italian Graciano Ranokia (Graziano Ranocchia), i Universitetit të Pizës, Platoni është varrosur në një zonë private në një kopsht në Akademi, pranë një faltoreje të shenjtë të Muzave.
Papiruset Herculaneum janë më shumë se 1800 rrotulla papirusi të zbuluara në shekullin e 18-të në Vilën e Papirusit në Herculaneum, një qytet i lashtë romak, i vendosur në qytetin e sotëm të Erkolanos (Ercolano), Kampanjë (Campania), Itali.
Ata u karbonizuan kur vila u përfshi nga shpërthimi i malit Vezuvius në vitin 79 pas Krishtit.
Gjendja jashtëzakonisht delikate e rrotullave i bën ato jashtëzakonisht të vështira për t'u lexuar.
Papiruset u lexuan duke përdorur një sy bionik, i cili zbuloi një mijë fjalë të reja, që është 30% më shumë se kur u analizuan për herë të fundit më shumë se 30 vjet më parë.
“Vendndodhja e varrit të Platonit përmbahej në një histori të Akademisë nga Filodemi i Gadarës, një filozof dhe poet epikurian që jetonte në Herculaneum”, tha z. Ranokia (Ranocchia).
Lajmin e bëri të ditur studiuesi në Bibliotekën Kombëtare të Napolit, ku prezantoi rezultatet afatmesme të projektit kërkimor “Shkollat Greke”.
Hulumtimi filloi tre vjet më parë dhe do të përfundojë në vitin 2026. Akademia e Platonit u shkatërrua nga diktatori romak Sulla në vitin 86 para Krishtit.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments