___.png)
Kiev, Ukrainë | Forcat e Armatosura të Polonisë kanë grumbulluar avionë luftarakë dhe kanë mobilizuar të gjitha forcat dhe burimet e disponueshme për të mbrojtur territorin gjatë sulmit masiv që Rusia po kryen me raketa dhe dronë kundër Ukrainës.
“Për shkak të një sulmi masiv nga Federata Ruse, e cila po kryen sulme me raketa lundrimi, raketa balistike dhe dronë kundër objekteve të vendosura, ndër të tjera, në Ukrainën Perëndimore, avionët polakë dhe aleatë u futën në hapësirën tonë ajrore”, shkruante Komanda Qendrore polake në rrjetin social virtual.
“Një sulm masiv rus shënjestroi të gjitha rajonet e Ukrainës gjatë natës: në total u lëshuan rreth 120 raketa dhe 90 dronë”.
Këtë e ka bërë të ditur presidenti ukrainas Volodimir Zelenski në një video në Telegram.
“Forcat tona të mbrojtjes ajrore shkatërruan mbi 140 objektiva ajrore”, shpjegoi presidenti, sipas të cilit, gjatë natës dhe mëngjesin e sotëm, terroristët rusë përdorën lloje të ndryshme dronësh, përfshirë Shaheds, si dhe raketa lundrimi, balistike dhe aeroballistike, si p.sh. Zirkon, Iskander dhe Kinzhal.
“Objektivi i armikut - vazhdoi presidenti Zelenski - ishte infrastruktura jonë energjetike në Ukrainë. Fatkeqësisht, disa struktura pësuan dëmtime për shkak të sulmeve të drejtpërdrejta dhe rënies së mbeturinave. Në Mikolaiv, një sulm me dron vrau dy persona dhe plagosi gjashtë të tjerë, duke përfshirë dy fëmijë. Ngushëllimet e mia më të thella për familjet dhe të dashurit e viktimave”.
“Për momentin - shtoi presidenti ukrainas - disa zona mbeten pa energji, por të gjitha forcat e nevojshme po punojnë për të zbutur pasojat dhe për të rivendosur infrastrukturën”.
“Ne u jemi mirënjohës të gjitha njësive tona të mbrojtjes ajrore që morën pjesë në aktivitetet që synonin zmbrapsjen e këtij sulmi: forcat raketore kundërajrore, aviacionin tonë - pilotët F16, avionët Su dhe MiG, grupet e lëvizshme të zjarrit dhe njësitë e luftës elektronike - të gjithë ata punuan së bashku në mënyrë të organizuar dhe të koordinuar.
I falënderoj ata për punën e tyre gjithmonë të besueshme të mbrojtjes”, përfundoi Zelenski.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comentarios