RRUGA “GORDIANI”; ROMË | SHPËRTHIM NË NJË PIKË HIDROKARBURESH; 36 TË PLAGOSUR; DISA NË RREZIK VDEKJEJE; DISA LAGJE TË ROMËS U TRONDITËN PA MASË.

Rruga “Gordiani”, Romë, Itali | Një shpërthim tronditi lagjen Prenestino të Romës këtë mëngjes, por impakti ishte aq i dhunshëm saqë zhurma u dëgjua në shumë zona të kryeqytetit.

Një pikë karburanti në rrugën “Gordiani” u përfshi nga flakët dhe aktualisht ka 36 të plagosur.

Të lënduarit u transportuan në nëntë spitale romane.

Nga këto - sipas asaj që del nga ndërhyrjet e ASL dhe Ares 118 - 6 janë në kodin e kuq: dy janë në Umberto I, një në San Giovanni, një në Gemelli dhe dy në Sant'Eugenio.

Dy të fundit, të transferuar nga spitali Casilino, janë në prognozë të rezervuar dhe janë në rrezik për jetën.

Bëhet fjalë për dy burra, të cilët mbërritën me djegie në 55% dhe 25% të trupit përkatësisht, dëmtime nga thithja dhe një barotraumë për shkak të lëvizjes së ajrit të shkaktuar nga shpërthimi.

Pacientët e tjerë u ndanë në spitalet Vannini, Casilino, San Giovanni, Pertini, San Carlo, Gemelli Isola, të gjitha në kodin e verdhë dhe të gjelbër.

Lëndimet e raportuara janë djegie, dehje dhe trauma të llojeve të ndryshme.

Të dhënat, siç nënvizojnë burimet spitalore, përditësohen vazhdimisht, pasi disa persona nga vendi i aksidentit mbërritën në spitale në mënyrë të pavarur ose të transportuar.

“Fatkeqësisht, ishte një zjarr serioz që duket se ka ndodhur nga një aksident gjatë shkarkimit të LPG-së. Oficerët e policisë që po kryenin ndërhyrjen, si dhe ekipet e tjera të shpëtimit, janë goditur nga ky shpërthim shumë i fortë dhe tani ndodhen në spitale të ndryshme”, shpjegoi komisioneri i policisë së Romës, Roberto Masuçi (Massucci).

Drejtori rajonal i brigadës së zjarrfikësve të Lazios, Ennio Akuilino (Aquilino), shpjegoi se ishte një shpërthim pas një një mosfunksionimi të sistemit të gazit, i krahasueshëm me një shpërthim bombe.

Pas një ndërhyrjeje fillestare për një rrjedhje gazi, për të cilën, mbërriti brigada e zjarrfikësve në një kohë të shkurtër, ndodhi shpërthimi.

Shpërthimet ishin të ndryshme.

“Operacionet ishin shumë të vështira sepse pranë shpërndarësit kishte një depo ambulancash që kishte bomba oksigjeni brenda, një rrethanë që mund të kishte shkaktuar shpërthimet”, shpjegoi majori i karabinierëve Andrea Kuatroki (Quattrocchi).

Një kamp veror u evakuua në kohë, përndryshe numri i viktimave do të kishte qenë shumë më i madh.

“Me erën e parë të tymit rreth orës 7:30 evakuuam fëmijët, ishin 8 prej tyre. Prindërit mbërritën, të gjithë fëmijët janë mirë. Nëse do të kishte ndodhur një orë më vonë, do të kishte qenë një masakër: do të kishte pasur 60 fëmijë nga kampi veror, ne përgjegjës, dhe 120 të rezervuar në pishinë. Qendra sportive është e dëmtuar, duket si një fushë beteje”, tha presidenti i klubit sportiv Villa De Sanctis, Fabio Balxani (Balzani).

Brigada e zjarrfikësve të Romës po kryen aktualisht kontrolle në ndërtesat përreth zonës ku ndodhi shpërthimi.

Janë raportuar dëme në shumë ndërtesa: xhama të thyer, korniza të grisura dhe mbeturina që fluturuan edhe disa metra larg.

Një burrë u shpëtua nga karabinierët në makinën e tij që po digjej, ai tani është në gjendje të rëndë.

Kryeministrja Xhorxha (Giorgia) Meloni po ndjek pasojat e shpërthimit dhe ka folur me kryetarin e bashkisë Roberto Gualtieri.

“Lutem për njerëzit e përfshirë në shpërthimin e një stacioni benzine, që ndodhi këtë mëngjes në lagjen Prenestino Labicano në zemër të dioqezës sime. Vazhdoj të ndjek me shqetësim zhvillimet e këtij aksidenti tragjik”, shkroi Papa Françeku në rrjetet sociale virtuale.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit