REPUBLIKA FEDERALE E GJERMANISË | SHKRIMTARJA KLAUDIA VUTKE (CLAUDIA WUTKE) DENONCOI SE ISH-BURRI I SAJ E DROGOI DHE E PËRDHUNOI PËR VITE ME RADHË.

Berlin, Republika Federale e Gjermanisë | Një grua gjermane pretendon se ish-i dashuri i saj e drogoi, përdhunoi dhe filmoi pasi zbuloi 67 video veçanërisht të dhunshme të saj vitin e kaluar.

Megjithatë, autoritetet nuk janë në gjendje ta hetojnë plotësisht rastin pasi shumë nga veprat penale të dyshuara tashmë janë parashkruar.

Autoritetet gjyqësore kanë mundësinë të shqyrtojnë vetëm dy incidente, pasi afati i parashkrimit për pjesën tjetër ka skaduar, siç zbuloi enti mediatik “Der Spiegel”, i cili nxori në dritë historinë e shkrimtares 59-vjeçare Klaudia Vutke (Claudia Wutke).

Zyra e prokurorit të Hamburgut tha se po shqyrtonte 65 dosjet e çështjeve për të parë nëse kishte një bazë ligjore për t'i ndjekur penalisht.

Në Gjermani, përdhunimi zakonisht parashkruhet pas pesë vjetësh, me disa përjashtime.

Policia gjermane e informoi shkrimtaren Vutke (Wutke) në muajin qershor të vitit 2025 se ajo shfaqet në video të shumta, të cilat dyshohet se janë bërë gjatë një periudhe prej 16 vitesh, në të cilat ish-partneri i saj e abuzon ndërsa është pa ndjenja.

Ajo e përshkruan këtë moment si tërmeti i parë, duke deklaruar se nuk ishte në dijeni të asgjëje dhe beson se ishte e droguar, por nuk mund ta provojë këtë, pasi gjurmët e mundshme të drogës tani janë zhdukur.

Në nëntorin e vitit 2025, ajo përjetoi tërmetin e dytë, kur u informua se hetimi për 65 nga 67 rastet ishte ndërprerë për shkak të parashkrimit.

Deri më sot, është ngritur ndjekje penale vetëm në dy raste.

Njëra sepse videoja përkatëse është nga viti 2021 dhe periudha pesëvjeçare nuk ka kaluar ende.

Tjetra ka të bëjë me një incident ku ish-partneri dyshohet se përdori një objekt të rrezikshëm, një shkop bejsbolli, i cili zgjat afatin e parashkrimit.

Gjykata pritet t’i shqyrtojnë këto dy raste së shpejti.

Rasti ka ngjallur reagime në lidhje me çështjen e parashkrimit.

Vetë shkrimtarja Vutke (Wutke) deklaroi se nuk është e mundur që shumica e akteve të mbeten të pandëshkuara, duke theksuar se viktimat nuk ishin në dijeni të krimeve ose videove për të qenë në gjendje t'i raportonin ato.

Nga perspektiva e autoriteteve gjyqësore, vihet re se afati i parashkrimit fillon nga momenti kur është kryer vepra penale dhe nuk ndikohet nga fakti nëse viktima e ka kuptuar më vonë se çfarë ka ndodhur.

Rasti risjell në pah reformën e vitit 2016 në Gjermani, kur dënimet për krimet seksuale u ashpërsuan, por në disa raste afatet e parashkrimit u shkurtuan.

Ministrja e Drejtësisë e Hamburgut, Anna Galina, tha se duhet të merret në konsideratë ndryshimi i kuadrit, duke argumentuar se periudha pesëvjeçare është e shkurtër, veçanërisht në rastet kur viktimat nuk mund të reagojnë.

Ministria federale e Drejtësisë, po shqyrton gjithashtu ndryshime të mundshme në ligjin mbi parashkrimin e veprave penale seksuale.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit