___.png)
Tokio, Japoni | “Sanksionet ekonomike që Shtetet e Bashkuara të Amerikës po përgatisin kundër Gjykatës Ndërkombëtare Penale (GjNP) kërcënojnë vetë ekzistencën e gjykatës”, tha znj. Tomoko Akane, presidentja e parë japoneze e GJNP-së, në një intervistë për gazetën Asahi Shimbun, duke shpjeguar se sanksionet që po diskutohen në Senat në Uashington do ta bëjnë të pamundur që Gjykata Penale Ndërkombëtare të vazhdojë të ekzistojë.
Dhoma e Përfaqësuesve e SHBA-së ka miratuar tashmë një projekt-ligj për vendosjen e sanksioneve ekonomike kundër GjNP-së, një vendim që erdhi pasi gjykata lëshoi një urdhër arresti në nëntor për kryeministrin izraelit Benjamin Netanjahu, ish-ministrin izraelit të Mbrojtjes Joav (Yoav) Gallant dhe zyrtarë të tjerë të shtetit hebre, se përfshirja e tyre e hamendësuar në krimet e luftës në Gaza dhe Liban.
Aktualisht, shpjegon gazeta japoneze, mbështetja dypartiake po ndërtohet edhe në Senatin e SHBA-ës për një ligj që imponon hakmarrje ekonomike kundër GjNP-së.
Ndërsa presidentja Akane tha se nuk ishte e sigurt për natyrën e saktë të përmbajtjes së ligjit, ajo theksoi se sanksionet mund të shtriheshin në një gamë të gjerë prokurorësh, gjyqtarësh dhe punonjësish të tjerë të gjykatës, duke përfshirë edhe veten.
“Sanksionet e mëdha do ta bënin të pamundur funksionimin e zakonshëm. Ekziston mundësia që bankat, jo vetëm në Shtetet e Bashkuara, por edhe në Evropë, të pezullojnë të gjitha transaksionet dhe nëse kjo ndodh, ne nuk do të jemi në gjendje t'i paguajmë punonjësit tanë, dhe do të detyrohemi të ndërpresim aktivitetin”, tha ajo.
Në atë rast, urdhërarrestet e lëshuara nga Gjykata kundër zyrtarëve izraelitë, por edhe udhëheqësve të Hamasit dhe presidentit rus Vladimir Putin, do të bëheshin de fakto të pazbatueshme.
“Sundimi i ligjit në komunitetin ndërkombëtar do të bëhej i pavlefshëm dhe viktimat e krimeve të luftës nuk do të kompensoheshin”, përfundoi Akane.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments