PRESIDENTI I REPUBLIKËS SË ITALISË SERXHO MATARELA (SERGIO MATARELLA) DO TË SHKOJË ME MISION NË JAPONI NGA 3 DERI MË 10 MARS | DO TË TAKOJË KRYEMINISTRIN ISHIBA DHE PERANDORIN NARUHITO: AXHENDA.

Romë, Itali | Presidenti i Republikës së Italisë Serxho Matarela (Sergio Mattarella), do të jetë në Japoni nga data 3 deri më 10 mars 2025 për një vizitë institucionale kërkuese, e cila, do të kulmojë një fazë të thellimit intensiv të marrëdhënieve dypalëshe dhe do të prekë fushat politike, institucionale, ekonomike dhe kulturore të bashkëpunimit midis Romës dhe Tokios.

Vizita, e cila, ka nisur prej disa vitesh, në një farë mënyre plotëson një boshllëk: udhëtimi i fundit i një presidenti të Republikës së Italisë në vendin aziatik daton 16 vjet më parë, ku protagonist ishte Xhorxho (Giorgio) Napolitano.

Misioni i presidentit Matarela, në të cilin, do të marrë pjesë në emër të qeverisë zëvendësministri i Punëve të Jashtme dhe Bashkëpunimit Ndërkombëtar Edmondo Çirieli (Cirielli), do të zhvillohet midis Tokios, Kiotos dhe Hiroshimës dhe përfshin takime midis presidentit të Republikës me perandorin Naruhito dhe Kryeministrin japonez, Shigeru Ishiba.

Programi i misionit përfshin një mbërritje në Tokio të hënën, më 3 mars 2025, e ndjekur nga një takim në mbrëmje me komunitetin italian në kryeqytetin japonez.

Dita e 4 marsit do të mbizotërohet nga angazhimet institucionale, me një vizitë në Pallatin Perandorak dhe një takim me perandorin Naruhito dhe perandoreshën Masako.

Pasdite, presidenti Matarela do të vizitojë Diet Building - parlamentin dydhomësh të Japonisë - dhe do të takohet me presidentët e Dhomës së Përfaqësuesve dhe të Dhomës së Këshilltarëve.

Në orët e vona të pasdites është planifikuar një ndalesë në sallën e koncerteve Meiji Kinenkan, ku do të mbahet koncerti i tenorit Vitorio Grigolo (Vittorio Grigolo), në prani të përfaqësuesve të Shtëpisë Perandorake, një moment i rëndësishëm shkëmbimi kulturor.

Të mërkurën më 5 mars, presidenti Matarela do të vizitojë selinë e Keidanren-it, Konfindustria Japoneze, për një takim me figura të rëndësishme ekonomike dhe sipërmarrëse nga të dy vendet.

Ngjarja do t'i paraprijë një forumi të madh biznesi të planifikuar për në 13 maj në Romë, me pjesëmarrjen e rreth 200 kompanive italiane dhe japoneze, që do të jetë një vazhdimësi e dialogut strategjik dhe do të forcojë më tej këtë partneritet ekonomik.

Pasdite, pas vizitës në tempullin budist Senso-ji, presidenti Matarela do të takohet me kryeministrin Shigeru Ishiba.

Më 6 mars 2025, presidenti i Republikës do të niset për në Kioto për dy ditë angazhime kulturore.

Presidenti Matarela do të vizitojë tempullin dhe kopshtin Nanzen-ji dhe do të takohet me bashkatdhetarët e tij.

Të nesërmen, kreu i shtetit do të vizitojë Pavijonin e Artë Kinkaku-ji, tempullin budist Kyomizu-dera dhe Teatrin Minami-za Kabuki.

Më 8 mars, pas një ndalese në tempullin To-ji, presidenti Matarela do të niset për në Hiroshima, ku do të vizitojë Memorialin dhe Muzeun e Paqes.

Presidenti i Republikës do të vizitojë mbrëmjen e sotme selinë e Nihon Hidankyo, shoqatës së të mbijetuarve të bombardimeve bërthamore, e cila u nderua me Çmimin Nobel për Paqen vitin e kaluar.

Do të jetë një moment tjetër kushtuar debatit publik, me një referencë të domosdoshme për krizat dhe konfliktet që ndodhin në nivel global.

Të dielën më 9 mars, pas një vizite në faltoren Itsukushima Shinto, presidenti Matarela do të largohet nga Japonia dhe do të ndalojë në Astana, Kazakistan, përpara se të kthehet në Itali.

Udhëtimi i presidentit Matarela në Japoni vjen në fund të dy viteve të shënuara nga një pikë kthese historike në marrëdhëniet midis vendit tonë dhe Japonisë, fillimi i së cilës, mund të gjurmohet që nga hyrja në fuqi e Marrëveshjes së Partneritetit Strategjik, në muajin janar të vitit 2023.

Ka pasur gjithashtu takime të shumta në nivele qeveritare në dy vitet e fundit, si midis kryeministrave dhe ministrave, falë edhe presidencës japoneze të G7-ës, në vitin 2023, dhe asaj italiane, vitin e kaluar.

Plani Dypalësh i Veprimit i miratuar vitin e kaluar identifikoi shtatë fusha kryesore për thellimin e bashkëpunimit midis Italisë dhe Japonisë.

Ato janë:

1- Diplomacia.

2- Mrojtja dhe siguria.

3- Qëndrueshmëria dhe siguria ekonomike.

4- Bashkëpunimi ekonomik dhe industrial.

5- Kultura dhe shkëmbimet ndërmjet njerëzve.

6- Bashkëpunimi akademik dhe kërkimi shkencor.

7- Ushqimi dhe bujqësia.

Bashkëpunimi në këto fusha po zhvillohet jo vetëm në nivel dypalësh, por edhe në një kuadër më të gjerë, atë të partneritetit Bashkimi Evropian-Japoni, veçanërisht në lidhje me tregtinë dhe me NATO-n për sigurinë.

Misioni i presidentit Matarella do të shënojë fillimin e një faze të mëtejshme të intensifikimit të tregtisë në secilin prej këtyre sektorëve, të diktuar edhe nga sfidat gjeopolitike dhe makroekonomike të paraqitura nga skenari i turbullt global.

Italia dhe Japonia kanë shumë gjëra të përbashkëta, pavarësisht distancës së madhe gjeografike.

Para së gjithash, ekziston një ngjashmëri e fortë e pikëpamjeve për çështjet kryesore gjeopolitike, që nga konflikti në Ukrainë e deri te sfidat e teatrit aziatik dhe indo-paqësor, të cilit, Italia po i kushton gjithnjë e më shumë vëmendje në rolin e saj si një anëtare e rëndësishme e BE-së dhe NATO-s.

Turnetë rajonale të vitit të kaluar nga Amerigo Vespuçi (Vespucci) dhe grupi Cavour Carrier Strike sollën diplomacinë detare italiane në Japoni dhe demonstruan konkretisht vendosmërinë e Italisë për të bashkëpunuar me aleatët e saj për një Indo-Paqësor të lirë dhe të hapur, bazuar në respektimin e status quo-së dhe rregullat e së drejtës ndërkombëtare.

Në sfond, vizita e presidentit Matarela do të ngrejë gjithashtu temën e përbashkët të marrëdhënieve me Kinën, si dhe ato me Korenë e Jugut.

Nga ana tjetër, qendra e marrëdhënieve në sferën ekonomike, me një partneritet objektiv të shkëmbimeve - Kina është destinacioni parësor për eksportet japoneze - që është në interesin e Tokios ta ruajë.

Kina është gjithashtu një bashkëbisedues thelbësor për menaxhimin e sfidave të paraqitura nga programet balistike dhe bërthamore të Koresë së Veriut.

Një takim trepalësh i ministrave të jashtëm të Japonisë, Kinës dhe Koresë së Jugut mund të mbahet në Tokio muajin e ardhshëm.

Megjithatë, Japonia është gjithashtu një bashkëbisedues i rëndësishëm në kontekstin e politikave italiane për Afrikën.

Tokio është një partner zhvillimi tradicional për shumë vende të Azisë dhe Afrikës.

Udhëtimi i presidentit Matarela në Japoni mund të ofrojë një mundësi për diskutim në lidhje me aleancën me Shtetet e Bashkuara, e cila, është vendimtare për të dy vendet si në aspektin e sigurisë ashtu edhe në shkëmbimet ekonomike.

Japonia, ashtu si Italia, është një fuqi tregtare dhe nxjerr 23 për qind të PBB-së së saj nga eksportet.

Hipotezat e tarifave dhe kriza e dukshme e marrëveshjeve tregtare janë shkak për shqetësim si në Romë ashtu edhe në Tokio, veçanërisht pasi një nga shtyllat e ekonomisë japoneze është pjesëmarrja në marrëveshjet e tregtisë së lirë dhe vendi aziatik prej vitesh është pozicionuar si një promotor i integrimit ekonomik dhe një model i praktikave të mira tregtare në Indo-Paqësorin, përmes Marrëveshjes Gjithëpërfshirëse dhe Transparencës.

Nga pikëpamja ekonomike, Japonia është ekonomia e katërt më e madhe në botë dhe një partner shumë i rëndësishëm për Italinë, me të cilën, ka bashkëpunime të shumta jo vetëm në sektorët tradicionalë si moda dhe agro-ushqimore, por edhe në fushën teknologjike.

Rreth 150 kompani italiane operojnë sot në Japoni dhe 380 kompani japoneze në Itali.

Kohët e fundit ka spikatur bashkëpunimi në sektorin e hapësirës ajrore, me Programin Global Combat Air (GCAP) për zhvillimin e një gjuajtësi të gjeneratës së gjashtë në bashkëpunim me Mbretërinë e Bashkuar që është një shembull emblematik; një projekt që është gjithashtu një majë shtize për bashkëpunim në fushat akademike, teknologjike dhe kërkimore.

Në një kohë kur ekziston rreziku i tkurrjes së disa artikujve të eksportit, rinisja dhe thellimi i marrëdhënieve ekonomike dhe tregtare me Azinë merr edhe më shumë rëndësi.

Vizita e presidentit Matarela do t'i paraprijë së shpejti Ekspozitës Universale 2025, programi në qytetin japonez të Osakës nga 13 prilli 2025, i cili, për gjashtë muaj do ta shohë gjithashtu vendin tonë si një protagonist të madh të një bashkëpunimi ekonomik dhe protagonist, falë investimeve të mëdha italiane, shkëmbime akademike dhe kulturore.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit