PEKINI DHE PARISI KANË NË PLAN TË TREFISHOJNË SASINË E ENERGJISË BËRTHAMORE PËR PËRDORIM CIVIL DERI NË VITIN 2050.

Pekin, Republika Popullore e Kinës | Republika Popullore e Kinës dhe Republika e Francës kanë lëshuar një deklaratë të përbashkët me rastin e vizitës shtetërore të Presidentit Emanuel Makron (3-5 dhjetor 2025).

Ato rifilluan dialogun dypalësh mbi klimën dhe energjinë duke vendosur në qendër zgjerimin e energjisë bërthamore civile.

“Të dy vendet - thuhet në deklaratë - janë të gatshme të mbështesin qëllimin global të trefishimit të kapacitetit bërthamor deri në vitin 2050, duke e paraqitur atë si një shtyllë të tranzicionit energjetik së bashku me rritjen e burimeve të rinovueshme”.

Në tekst, Pekini dhe Parisi riafirmuan angazhimin e tyre për forcimin e multilateralizmit klimatik, zbatimin e marrëveshjeve, duke filluar nga Protokolli i Kiotos në Kornizën Globale Kunming-Montreal mbi Biodiversitetin dhe mbështetjen e qëllimeve të Marrëveshjes së Parisit; duke përfshirë angazhimin për të kufizuar rritjen mesatare të temperaturave globale në 1.5 gradë Celsius.

Të dy qeveritë u zotuan gjithashtu të intensifikojnë bashkëpunimin mbi energjinë e pastër, gazin natyror, çmimet e karbonit, financimin e klimës, përshtatjen, si dhe të përshpejtojnë heqjen graduale të lëndëve djegëse fosile në një mënyrë të drejtë, të rregullt dhe të barabartë.

Pekini dhe Parisi gjithashtu riafirmuan mbështetjen e tyre për strategjinë e Organizatës Ndërkombëtare Detare për zero emetime në sektorin detar deri në vitin 2050.

Deklarata e përbashkët përfshin kapituj mbi biodiversitetin, oqeanet dhe shpyllëzimin, me qëllim përmbysjen e degradimit të pyjeve deri në vitin 2030 dhe promovimin e menaxhimit të integruar të ujërave përpara konferencës së OKB-së në vitin 2026.

Të dyja vendet shprehën gjithashtu mbështetjen e tyre për negociatat për një traktat global kundër ndotjes plastike.

Së fundmi, Pekini dhe Parisi shprehën gatishmërinë e tyre për të bashkëpunuar në mbështetjen e vendeve në zhvillim përmes financimit të klimës deri në vitin 2035 dhe njoftuan mundësinë e krijimit të një grupi pune dypalësh për klimën dhe mjedisin, me një takim të parë të planifikuar për vitin 2026.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit