___.png)
Londër, Britani e Madhe | Një test i thjeshtë gjaku, në të ardhmen, mund të mjaftojë për të diagnostikuar sëmundje të tilla si Parkinsoni dhe Skleroza Laterale Amiotrofike, krahas formave më të zakonshme të demencës: dy studime që kanë identifikuar treguesit e këtyre sëmundjeve në gjak shkojnë pikërisht në këtë drejtim, të cilat, në rastin e Parkinsonit manifestohen vite përpara fillimit të simptomave.
Megjithëse përdorimi i tij në praktikën mjekësore është ende larg, kjo qasje i hap rrugën diagnozave të sakta dhe të hershme, të cilat, nga ana tjetër, do të lejonin administrimin e terapive më efektive dhe parandalimin e dobishëm për ngadalësimin e përparimit të sëmundjes.
Botuar në revistën Nature Communications, studimi mbi diagnostikimin e sëmundjes së Parkinsonit drejtohet nga University College London dhe Qendra Mjekësore Universitare e Goettingen (Gjermani) ku edhe Italia kontribuoi në të, me Universitetin e Bolonjës dhe Institutin e Shkencave Neurologjike të Bolonjës.
Studiuesit kanë zhvilluar një test gjaku, i cili, me ndihmën e Inteligjencës Artificiale, mund të identifikojë tetë shënues tipikë të sëmundjes së Parkinsonit, edhe shtatë vjet përpara se të shfaqen simptomat e para.
Mjeti rezultoi i aftë për të diagnostikuar çrregullimin me saktësi 100%, ndërsa aftësia e tij për të parashikuar sëmundjen u testua në 72 njerëz, të monitoruar gjatë 10 viteve në vijim: testi i bazuar në inteligjencë artificiale (AI) tregoi një rrezik të lartë për 79% të individëve dhe parashikimet e tij deri më tani janë dëshmuar të sakta.
“Ndërsa terapitë e reja për trajtimin e Parkinsonit bëhen të disponueshme, ne duhet të diagnostikojmë pacientët përpara se të shfaqin simptoma”, tha z. Kevin Mills nga University College London, i cili koordinoi studiuesit së bashku me z. Brit Mollenhauer i Qendrës Goettingen.
“Ne nuk mund të ripërtërijmë qelizat e trurit - tha z. Mills - dhe për këtë arsye ne duhet të mbrojmë ato që kemi.”
Një test gjaku dha gjithashtu rezultate të shkëlqyera për demencën dhe ALS, siç raportohet nga studimi i publikuar në Nature Medicine dhe i udhëhequr nga Qendra Gjermane për Sëmundjet Neurodegjenerative (Dzne).
Në këtë rast, testi bazohet në vetëm dy proteina, të cilat megjithatë nuk maten drejtpërdrejt në gjak sepse zakonisht janë të fragmentuara.
Nivelet e këtyre molekulave përftohen në vend të kësaj falë analizës së flluskave të vogla të yndyrës të lëshuara në qarkullimin e gjakut nga qelizat njerëzore.
Efektiviteti i testit u demonstrua në 991 të rritur gjermanë dhe spanjollë, tek të cilët gjithashtu bëri të mundur marrjen e një diagnoze përfundimtare të patologjisë, diçka shumë e vështirë me metodat aktuale pasi kërkon analizën e indit të trurit.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments