PËRFAQËSUESJA E LARTË E BE-së PËR PUNËT E JASHTME DHE POLITIKËN E SIGURISË KAJA KALLAS SHKOI PËR VIZITË NË BEOGRAD KU LA DETYRA TË RËNDËSISHME PËR SHTETIN SERB.

Beograd, Serbi | Rëndësia që Serbia të vazhdojë dhe përshpejtojë procesin e reformave në mënyrë që të përparojë në rrugën drejt integrimit evropian u nënvizua nga përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas.

Duke folur në një konferencë për shtyp në fund të vizitës së saj në Beograd, ajo tha se reformat, përveçse janë në letër, duhet të kenë një ndjekje konkrete për sa i përket zbatimit.

Ajo shtoi se vendimtare janë reformat që synojnë garantimin e lirisë së medias, ato që kanë të bëjnë me ligjin zgjedhor dhe luftën kundër korrupsionit.

Vendosmëria e Serbisë për të vazhduar në rrugën drejt integrimit në Bashkimin Evropian u nënvizua nga kryeministri Gjuro Makut (Djuro Macut) në bisedimet e tij sot në Beograd me përfaqësuesen e Lartë të BE-së për Punët e Jashtme dhe Politikën e Sigurisë, Kaja Kallas.

Siç raportoi qeveria në një deklaratë, kryeministri Makut (Macut) bëri thirrje për përshpejtimin e procesit të integrimit evropian të Serbisë, me hapa konkretë drejt hapjes së grupit negociues 3 mbi konkurrueshmërinë dhe rritjen gjithëpërfshirëse.

“Serbia - shtoi kryeministri - mbetet e përkushtuar ndaj procesit të reformave me qëllim përmbushjen e kritereve të BE-së, e vetëdijshme për rëndësinë e madhe që reformat kanë për të gjithë popullsinë”.

Gjatë takimit me znj. Kallas u trajtua edhe tema e Kosovës dhe vazhdimi i dialogut midis Beogradit dhe Prishtinës.

Në takim, sipas një deklarate qeveritare, morën pjesë ministri i Jashtëm Marko Gjuriç, ministri i Integrimit Evropian Nemanja Staroviç, i dërguari Special i BE-së dhe ndërmjetësi në Dialogun me Kosovën, Peter Sorensen, dhe shefi i Përfaqësisë së BE-së në Serbi, Emanuele Giaufret.

Përfaqësuesja e Lartë Kaja Kallas, e cila mbërriti në Beograd vonë dje në mbrëmje, u takua menjëherë me presidentin Aleksandar Vuçiç; këtë mëngjes ajo u takua edhe me kryetaren e parlamentit Ana Brnabiç.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit