OPERACION POLICOR NDËRKOMBËTAR KUNDËR GRUPIT TË PIRATËVE KIBERNITIKË NONAME057(16) QË VEPROJNË NGA TERRITORI I FEDERATËS RUSE.

Romë, Itali | Operacion nga Policia Postare italiane - i koordinuar nga Prokuroria e Romës - kundër grupit rus të hakerave Noname057(16), përgjegjës që nga viti 2022 për mijëra sulme në faqet e internetit qeveritare, faqet e administratës publike, infrastrukturat e transportit publik, institucionet bankare, kujdesin shëndetësor dhe telekomunikacionin në disa vende evropiane, përfshirë Italinë.

Hetimi, i koordinuar ndërkombëtarisht nga Eurojust dhe Europol, çoi në identifikimin e shumë anëtarëve të grupit, duke zbuluar se kush qëndronte pas serverave të largët, llogarive Telegram dhe pagesave me kriptomonedha të lidhura me ekipin.

Pesë urdhër-arreste ndërkombëtare janë lëshuar kundër qytetarëve rusë, dy prej të cilëve besohet se janë udhëheqës të organizatës.

Më shumë se 600 servera në vende të ndryshme janë çaktivizuar dhe disa janë sekuestruar.

Operacioni - i quajtur Eastwood - u krye në Itali, njëkohësisht me aktivitete të ngjashme në Gjermani, Shtetet e Bashkuara, Holandë, Zvicër, Suedi, Francë dhe Spanjë.

Sipas policisë, “Noname” rekrutoi mbështetës duke shpërndarë lista të objektivave perëndimorë dhe më pas duke marrë përgjegjësinë për sulmet përmes kanaleve të saj anonime në Telegram.

Përmes kanalit të Projektit DDosia, ekipi siguroi softuer për të aksesuar dhe operuar grupin.

Infrastruktura kriminale u zbulua se ishte e strukturuar në një nivel qendror komande dhe kontrolli në Federatën Ruse, servera të ndërmjetëm të dedikuar për anonimizimin e sinjaleve dhe shpërndarjen e gjurmëve, dhe mijëra kompjuterë të vënë në dispozicion të “Noname” nga anëtarët e tij për sulme.

Grupi koordinoi sulmet nga territori rus, duke i shpërblyer anëtarët e tij në kriptovaluta.

Sulmet e shpërndara të mohimit të shërbimit (DDoS), që përfshinin një numër të madh lidhjesh të njëkohshme nga kompjuterët në faqet e synuara, synonin të shkaktonin shembjen e tyre dhe ndërprerjen e përkohshme, me pasoja të rëndësishme në ofrimin e shërbimeve publike.

Në Itali, hetimet nga Qendra Kombëtare e Krimit Kibernetik për Mbrojtjen e Infrastrukturës Kritike, së bashku me Qendrat e Operacioneve të Policisë Postare të Piemontes, Lombardisë, Venetos, Friuli Venecia Xhulias (Giulia), Emilia-Romanjës (Romagna) dhe Kalabrisë, çuan në identifikimin e pesë individëve që besohet se janë anëtarë të grupit, të cilët, kanë kryer sulme ndaj infrastrukturës kombëtare dhe evropiane.

Prokuroria Publike e Romës lëshoi urdhër-kërkime kundër pesë individëve, të cilët u ekzekutuan.

Po shqyrtohen edhe raste të tjera.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit