___.png)
Bratisllavë, Sllovaki | Një tabelë e mbajtur nga demonstruesit në Bratislavë shkruhej thjesht: “Kjo erë tradhtie”.
Kryeministri i Sllovakisë ka tërhequr kritika nga e gjithë Evropa dhe nga njerëzit e tij pas vizitës së tij të papritur në Moskë për bisedime ballë për ballë me presidentin rus Vladimir Putin - të dielën.
Kryeministri Robert Fico është vetëm udhëheqësi i tretë i Bashkimit Europian që viziton presidentin Putin në Moskë që kur presidenti rus urdhëroi pushtimin e Ukrainës në muajin shkurt të vitit 2022.
Kremlini tha se të dy udhëheqësit diskutuan situatën ndërkombëtare dhe dërgesat e gazit natyror rus.
Gazi natyror rus ende rrjedh përmes Ukrainës dhe në disa vende të tjera evropiane, duke përfshirë Sllovakinë, sipas një marrëveshjeje pesëvjeçare të nënshkruar para luftës që do të skadojë në fund të vitit.
Presidenti i Ukrainës Volodimir Zelenski u tha udhëheqësve të Bashkimit Europian javën e kaluar se Ukraina nuk kishte ndërmend të rinovonte marrëveshjen, për të cilën kryeministri Fico këmbënguli se do të dëmtonte Sllovakinë dhe interesat e saj.
Ai tha se vizita e tij në Moskë ishte një reagim ndaj deklaratës së presidentit Zelenski dhe se presidenti Putin i kishte thënë atij se Rusia ishte ende e gatshme të dërgonte gaz në Perëndim.
Në kryeqytetin e Sllovakisë, Bratislavë, njerëzit dolën në rrugë për të protestuar pas takimit, me pankarta në mbështetje të Ukrainës si dhe me përshkrime jo të këndshme për z. Fico.
Në një tabelë shkruhej thjesht: “Kjo erë tradhtie”.
Presidenti Zelenski tha se mosgatishmëria e treguar nga kryeministri Fico për të zëvendësuar gazin rus është një çështje e madhe sigurie për Evropën dhe vuri në dyshim stimujt e mundshëm financiarë që i ofrohen udhëheqësit sllovak.
“Pse ky udhëheqës është kaq i varur nga Moska? Çfarë i paguhet dhe me çfarë paguan”, pyeti presidenti Zelenski.
Në fjalimin e tij të natës të hënën, presidenti Zelenski tha se kryeministri Fico kishte marrë një ofertë kompensimi për humbjet nga marrëveshja e tranzitit që skadon, por se ai nuk donte kompensim për sllovakët.
Në një deklaratë, Ministria e Jashtme e Ukrainës tha se dobësia, varësia dhe dritëshkurtësia e politikës energjetike të zotit Fico është një kërcënim për të gjithë Evropën.
“Përpjekjet e vazhdueshme të udhëheqësit sllovak për të ruajtur varësinë energjetike nga Moska janë të habitshme dhe përfaqësojnë një politikë të turpshme qetësimi”, shtoi ministria ukrainase.
Qeveria çeke kritikoi gjithashtu udhëtimin e z. Fico në Moskë, duke vënë në dukje vendimin e saj për të hequr dorë nga energjia ruse.
“Ishte qeveria çeke ajo që siguroi pavarësinë nga furnizimet ruse të energjisë në mënyrë që ne të mos na duhej të zvarriteshim përpara një vrasësi masiv”, tha ministri i jashtëm çek Jan Lipavsky.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comentarios