___.png)
Tiranë, Shqipëri | Në listën e prioriteteve të Ministrisë së Mbrojtjes, së Republikës së Shqipërisë, është dhe rijetëzimi i bazës së Porto Palermos për qëllime të dyfishta, civile dhe ushtarake.
Lajmi u bë i ditur nga ministri i Mbrojtjes, i Republikës së Shqipërisë, Pirro Vengu, në një postim në rrjetet sociale virtuale, ku ai ndau pamje nga Porto Palermo.
Ministri Vengu e cilësoi Porto Palermon një kombinim të rrallë të natyrës mahnitëse me një prej veprave më të rëndësishme ushtarake në të shkuarën.
“Në listën e prioriteteve të Ministrisë së Mbrojtjes është dhe rivitalizimi i bazës për qëllime të dyfishta, civile dhe ushtarake.
Duke mirëadministruar objektet e këtij kompleksi ushtarak dhe civil, duke përmirësuar kushtet dhe akesesin për publikun në tërësinë e Gjirit të Panormës, synojmë të gjenerojmë sa më shumë të ardhura publike që do të jenë në funksion të mirëmbajtjes së këtij aseti të vyer”, theksoi ministri Vengu.
Projekti synon miradministrimin e zonës, e cila ka nisur të jetë një destinacion turistik i privilegjuar, duke respektuar normat mjedisore dhe duke ofruar kushte sa më të larta sigurie lundrimore.
Hapi tjetër do të jetë përshtatja joinvazive e objekteve të kompleksit që nuk gëzojnë më funksione ushtarake, me qëllim krijmin e një atraksioni turistik të qëndrueshëm.
Projekti synon gjithashtu të rikthejë në gatishmëri teknike këto asete të çmuara të Forcës sonë Detare, të cilat mund të shërbejnë për qëllime stërvitjesh kombëtare dhe ndërkombëtare.
Porta e tunelit të fortifikuar të Porto Palermos u hapet për herë të parë pas 32 vjetësh më 11 gusht të këtij viti.
Ndërtimi i tunelit nisi në vitin 1969 dhe mbaroi në vitin 1988.
Ai shërbente për strehimin dhe kalimin e sigurt të mjeteve detare të marinës ushtarake të kohës, duke shërbyer njëkohësisht si një bazë e fuqishme dhe e mbrojtur.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Commentaires