NË GREQI DO TË NDALOHET ME LIGJ SHITJA E CIGAREVE DHE PIJEVE ALKOOLIKE TE TË MITURIT.

Athinë, Greqi | Qeveria greke po i jep fund shitjes së produkteve të duhanit dhe pijeve alkoolike të miturve me një projektligj përkatës nga Ministria e Shëndetësisë.

Shitësit do të duhet të kontrollojnë moshën e blerësit përpara se të vazhdojnë me çdo transaksion, duke kërkuar një dokument identifikimi, pasaportë ose patentë shoferi, ndërsa në të njëjtën kohë do të ketë edhe mundësinë e verifikimit të moshës përmes aplikacionit Kids Wallet.

Projektligji në fjalë përcakton se vetëm nëse klienti mund të vërtetojë se ka mbushur moshën madhore do të jetë e mundur të kryhet transaksioni. Përndryshe, shitësi është i detyruar të ndërpresë blerjen dhe shitjen.

Në cilat zona aplikohen frenat?

Masa mbulon të gjitha llojet e pikave të shitjes, siç janë vendet e argëtimit, baret, kioskat dhe supermarketet.

Të njëjtat mbrojtje do të zbatohen edhe për blerjet online, në mënyrë që të mos jetë e mundur të anashkalohen kontrollet përmes tregtisë elektronike.

Sanksionet: Projektligji përcakton gjithashtu një mekanizëm për vendosjen e sanksioneve ndaj shitësve që nuk i përmbahen rregullave dhe refuzojnë të verifikojnë moshën e blerësve të rinj.

Shitja ndaj të miturve do të përbëjë përsëri një vepër penale, ndërsa parashikohen edhe dënime administrative, të cilat, do të përshkallëzohen në rast të shkeljeve të përsëritura të rregullave.

Ndër penalitetet e parashikuara janë mbyllja e përkohshme e një dyqani, si dhe heqja e përhershme e licencës së funksionimit për shkelësit e rëndë të përsëritur.

Një Departament i Posaçëm kompetent është krijuar brenda EODY-së për të monitoruar qarkullimin e këtyre produkteve specifike.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit