MINISTRIA E MBROJTJES E REPUBLIKËS SË SHQIPËRISË BËRI APEL PËR MARRJEN E MASAVE SEPSE PRITEN RESHJE INTENSIVE NË 5 QARQE TË VENDIT.

Tiranë, Shqipëri | Bazuar në raportimin e Shërbimit Meteorologjik Ushtarak dhe IGJEO, Ministria e Mbrojtjes, e Republikës së Shqipërisë, nëpërmjet Agjencisë Kombëtare të Mbrojtjes Civile, u bën thirrje të gjitha strukturave vendore dhe qendrore të marrin masa parandaluese për shmangien e përmbytjeve dhe të jenë në gatishmëri për të reaguar në kohë ndaj çdo situate emergjente.

Sipas IGJEO-s dhe SHMU-it, pjesën e dytë të ditës së sotme priten reshje të dobëta në të gjitha qarqet.

“Në 23 dhjetor, reshje intensive deri shumë intensive do të përfshijnë qarqet Vlorë, Gjirokastër, Shkodër, Kukës dhe Dibër, ndërsa në zonat e tjera reshjet do të jenë mesatare deri intensive, të shoqëruara me shtrëngata”, thuhet në njoftimin për shtyp.

Po ashtu, në lartësitë mbi 400 metra në Veri, Lindje dhe Juglindje reshjet do të jenë në formë dëbore, duke shkaktuar ngrica dhe vështirësi në transport.

Në këtë situatë, theksohet se bashkëpunimi dhe veprimi i shpejtë janë thelbësore për të minimizuar pasojat dhe për të garantuar sigurinë e qytetarëve.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit