___.png)
Tiranë, Shqipëri | Rijetëzimi i industrisë ushtarake dhe modernizimi i Forcave tona të Armatosura ishin temat kryesore të bisedave gjatë takimeve të veçanta që ministri i Mbrojtjes, i Republikës së Shqipërisë, Pirro Vengu zhvilloi me ambasadorët e Francës, Mbretërisë së Bashkuar dhe Bullgarisë.
Në takimin me ambasadorin e Francës, ai shprehu interesin për të shqyrtuar mundësitë e bashkëpunimit në rijetëzimin e industrisë ushtarake, modernizimit, si dhe zgjerimin e mundësive në fushën e edukimit dhe trajnimit.
Ministri Vengu e informoi ambasadorin e Britanisë së Madhe për zhvillimet e fundit në fushën e industrisë së mbrojtjes si dhe proceset e modernizimit.
“Situata e sigurisë në Ballkanin Perëndimor dhe shqetësimi për ndërhyrjen dhe aktivitetet hibride nga aktorët e huaj në rajon ishte një tjetër temë e bisedës, ndërkohë që vlerësuam maksimalisht stërvitjet ushtarake të përbashkëta ‘Corridor VIII Response’ që po zhvillohen në territorin shqiptar në interes të rritjes së ndërveprueshmërisë, lëvizshmërisë ushtarake dhe linjave të furnizimit në rajonin e Europës Juglindore”, tha ministri Vengu në një postim në rrjetet sociale virtuale.
“Ambasadori bullgar - informoi ministri Vengu - vlerësoi kontributin e trupave shqiptarë në grupbatalionin e NATO-s në Novo Selo, ndërkohë që ramë dakord të vijojmë ndërveprimin e përbashkët në mbështetje të promovimit të Korridorit VIII si një nyje e rëndësishme lidhjeje sigurie mes Adriatikut dhe Detit të Zi”.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments