MBRETËRIA E SUEDISË | QEVERIA SYNON TË NDRYSHOJË LIGJET PËR TË BURGOSUR 13-VJEÇARËT QË KANË KRYER VRASJE.

Stokholm, Mbretëria e Suedisë | Rritja e sulmeve me armë dhe bomba të lidhura me bandat në Suedi, dhjetëra prej të cilave janë kryer nga të mitur, e ka dalluar vendin nga homologët e tij evropianë dhe i ka vënë Autoritetet përballë një problemi urgjent se çfarë do të duhet të bëjnë me fëmijët që kryejnë vrasje?

Qeveria, e cila ka qenë në pushtet që nga viti 2022 dhe po shkon drejt zgjedhjeve në shtator, ku krimi është një çështje qendrore në axhendë, argumenton se qasja e butë e së kaluarës ka dështuar dhe është koha për të ashpërsuar qëndrimin e saj duke dërguar fëmijët nën moshën 13 vjeç në burg, në vend që të shkojnë në shërbimet e mirëqenies sociale.

Disa ekspertë dhe parlamentarë paralajmërojnë se kjo është qasja e gabuar.

Suedia po lufton një valë krimi të bandave, me rrjete aktive në trafikun e drogës, mashtrimet dhe grabitjet, dhe fitimet e tyre arrijnë në rreth 185 miliardë krona suedeze (20 miliardë dollarë) në vit.

Policia suedeze vlerëson se ka 17500 anëtarë aktivë të bandave kriminale dhe rreth 50000 bashkëpunëtorë të tyre.

Bandat zakonisht përdorin mediat sociale për të rekrutuar adoleshentë, dhe në disa raste fëmijë deri në 11 vjeç, për të kryer vrasje dhe shpërthime me bomba në vend.

Sipas një ligji të ri të propozuar, mosha e përgjegjësisë penale do të ulet në 13 vjeç nga 15 vjeç, më e ulët se në shumicën e vendeve evropiane, dhe të miturit e dënuar për krimet më të rënda do të dërgohen në burgje të posaçme (speciale).

Njëri prej tyre do të jetë për vajza.

“Po përballemi me emergjencë”, tha në muajin prill Ministri i Drejtësisë, Gunar Stormer (Gunnar Strömer).

“Vitin e kaluar, 52 fëmijë nën moshën 15 vjeç u përfshinë në gjyqe të akuzuar për vrasje ose tentativë vrasjeje. Pra, nuk po flasim për vjedhje apo edhe sulme apo grabitje. Po flasim për vrasje”, shtoi ai.

Parlamenti do të votojë për legjislacionin, i cili do të rishikohet pas pesë vjetësh, më 15 qershor.

Ulja e moshës së përgjegjësisë penale është një taktikë e re për të luftuar dhunën e bandave kriminale, ndërsa të tjera përfshijnë dënime më të gjata me burg dhe kompetenca të zgjeruara të policisë.

Qeveria thotë se masat e saj të rrepta po japin fryte.

44 persona u vranë në të shtëna në vitin 2025; 62 në vitin 2022. Shumica e anëtarëve të bandave janë tashmë në burg.

Por ndalimi i rekrutimit të fëmijëve do të jetë shumë më i vështirë. Qeveria thotë se burgu do të veprojë si një pengesë dhe programet intensive të rehabilitimit do të parandalojnë recidivizmin.

Në burgun e Rosersbergut, në veri të Stokholmit, një nga tre burgjet që po rindërtohet për të strehuar adoleshentët më të dhunshëm, jeta në burg do të përqendrohet në arsim.

Në kohën e tyre të lirë, të burgosurit do të jenë në gjendje të shikojnë televizor, të luajnë videolojëra ose të ushtrohen në një zonë të projektuar posaçërisht.

Qelitë do të jenë të mbyllura nga ora 8 e mbrëmjes çdo natë.

Deri më tani, shkelësit më të këqij të të miturve në Suedi janë menaxhuar nga shërbimet sociale.

Por sistemi shihet gjerësisht si një dështim.

“Nëntë nga dhjetë anëtarë të rinj të bandave kriminale të mbajtura në kujdes rezidencial rikthehen në krim”, tha një raport nga Gjykata Suedeze e Auditorëve.

Tetë nga 10 përfundojnë në burg si të rritur.

“Burgosja do të mbrojë qytetarët, do të sigurojë drejtësi për viktimat dhe do të ndërpresë lidhjet me bandat”, pretendon qeveria.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit