___.png)
Tiranë, Shqipëri | Udhëheqësi suprem i shiitëve libanezë që nga viti 1992, ai e transformoi “Partinë e Zotit” në një fuqi ushtarake dhe politike.
Fjalimet e tij u ndoqën nga miliona në të gjithë botën arabe.
Z. Hassan Nasrallah, sekretari i përgjithshëm i Hezbollahut, u vra në një bombardim izraelit në periferi jugore të Bejrutit, kryeqyteti i Libanit.
Kjo është bërë e ditur nga forcat e armatosura të shtetit hebre, sipas të cilave, në sulm kanë vdekur edhe komandantë të tjerë të lëvizjes shiite libaneze, përfshirë z. Ali Karki, kreu i frontit jugor.
Hezbollahu deri më tani as e ka konfirmuar dhe as mohuar lajmin.
Disa orë më parë ushtria izraelite kishte deklaruar se kishte mobilizuar tre batalione rezervë, pasi tensionet me Libanin dukej se pritej të rriteshin më tej.
Në mëngjesin e vonë të së shtunës, 28 shtator 2024, Hezbollah pohoi vdekjen e tij.
Biografia politike: I lindur në Bejrut në vitin 1960 në një familje jo veçanërisht fetare shiite, z. Nasrallah iu afrua politikës në vitet 1970, fillimisht duke iu bashkuar lëvizjes Amal, dhe më pas, pas pushtimit izraelit të vitit 1982, milicive që krijuan Hezbollahun.
Në vitin 1992, vetëm 32 vjeç, ai u bë sekretar i përgjithshëm pas vrasjes së paraardhësit të tij, z. Abbas al-Musaui (Musawi) në një sulm izraelit.
Nën udhëheqjen e z. Nasrallah, Hezbollahu u transformua nga një milici e thjeshtë në një forcë të madhe ushtarake dhe politike në Liban dhe në të gjithë Lindjen e Mesme.
Falë ndihmës masive nga Irani. “Partia e Zotit” u pajis me një arsenal raketash të afta për të goditur thellë në territorin izraelit.
Në vitin 2000, ajo detyroi Izraelin të tërhiqej nga Libani jugor pas 18 vitesh okupim, ndërsa në vitin 2006 i shkaktoi humbje të mëdha ushtrisë së shtetit hebre në një konflikt të shkurtër por intensiv veror.
Por Hezbollahu gjithashtu u bë një lojtar i madh politik në Liban, ku kontrollon një pjesë të konsiderueshme të Parlamentit dhe disa ministri kryesore.
Pavarësisht akuzave për terrorizëm nga Shtetet e Bashkuara dhe Evropa, shumë e konsiderojnë atë një lëvizje legjitime të rezistencës kundër pushtimit izraelit.
Z. Nasrallah, nga ana e tij, nuk e kishte fshehur kurrë urrejtjen e tij ndaj shtetit hebre.
“Nëse ne do të kërkonim në të gjithë botën për një person më frikacak, të neveritshëm, të dobët dhe të brishtë në psiqikë, mendje, ideologji dhe fe, nuk do të nuk do të gjenim askënd si hebreu”, tha ai në një fjalim në vitin 2002, të cituar nga enti mediatik amerikan Kohërat e Jorkut të Ri (New York Times).
I njohur për karizmën dhe aftësitë e tij oratorike, z. Nasrallah nuk ishte shfaqur në publik që nga viti 2007 për shkak të frikës nga sulmet.
Fjalimet e tij, shpesh të zjarrta, ishin ngjarje të vërteta mediatike të ndjekura nga miliona njerëz në Liban dhe në botën arabe.
Duke komentuar sulmin e Hamasit ndaj Izraelit më 7 tetor 2023, ai deklaroi: “Ky Izrael që posedon armë bërthamore dhe forcën më të fortë ajrore në rajon është më i brishtë se rrjeta e merimangës”.
Vdekja e z. Nasrallah përfaqëson një goditje të madhe për Hezbollahun dhe mbështetësin e tij kryesor, Iranin.
Sipas burimeve izraelite, lideri shiit u vra nga një skuadron luftarak F-35 të pajisur me bomba “bunker shpërthyese”, të afta për të depërtuar në strehimoret nëntokësore.
Vajza e tij, Zainab-ja dhe komandantë të tjerë të Hezbollahut gjithashtu vdiqën në sulm.
Zhdukja e një figure të tillë karizmatike rrezikon të destabilizojë më tej ekuilibrin tashmë të brishtë libanez.
“Grupi do të vazhdojë, ai nuk është i përqendruar në një udhëheqës të vetëm”, thuhet nga komentetorë të ndryshëm.
Të tjerë, të tronditur, përpiqen të mos e besojnë lajmin.
“Jam i dëshpëruar, nuk di çfarë të mendoj”, tha një ithtar i Hezbollahut.
Ndërkohë, tensioni po rritet në të gjithë Lindjen e Mesme për përgjigjen e mundshme iraniane.
Sipas ambasadës së Teheranit në Bejrut, vrasja e z. Nasrallah ndryshon rregullat e lojës.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments