IZRAEL: PËR HERË TË PARË QË NGA MUAJI DHJETOR KRYEMINISTRI BENJAMIN NETANJAHU MBAJTI NJË KONFERENCË PËR SHTYP KU SQAROI SHUMËÇKA MBI LUFTËN KUNDËR HAMASIT DHE MBI NDIHMAT HUMANITARE.

Jeruzalem, Izrael | Për herë të parë që nga dhjetori, kryeministri Benjamin Netanjahu mbajti një konferencë për shtyp të mërkurën.

Ai e hapi konferencën me një deklaratë dhe më pas iu përgjigj pyetjeve të gazetarëve, duke shënuar kështu konferencën e parë të tillë në gjashtë muaj.

Në fillim, kryeministri Netanjahu u shprehu ngushëllime familjeve të rreshterit Jusef Jehuda Çirik (Yosef Yehuda Chirik) dhe rreshterit të shtabit Danilo Mokanu, të cilët u vranë në Rripin e Gazës.

“Kjo luftë ka një kosto, por ka një qëllim të qartë: të mposhtim Hamasin, të sjellim të gjithë pengjet tona në shtëpi dhe të sigurohemi që Gaza të mos përbëjë kurrë më kërcënim për Izraelin. Ne jemi të përkushtuar për t'i arritur këto qëllime plotësisht”, tha ai.

Kryeministri Netanjahu shqyrtoi arritjet e luftës dhe përshkroi strategjinë e ardhshme të kabinetit.

“Kemi arritur shumë së bashku, por puna nuk ka mbaruar ende. Kemi një plan të detajuar.

Filluam në Gaza, eliminuam dhjetëra mijëra terroristë, shkatërruam mendjet kryesore dhe shkatërruam tunele të panumërta terroristësh.

Ata që na sulmuan kaq brutalisht tani e kuptojnë shkallën e shkatërrimit që i sollën vetes.

Falë ushtarëve tanë dhe vendimeve strategjike që morëm, pengjet janë kthyer.

Ne sollëm në shtëpi 148 pengje të gjallë. Ne e dimë me siguri se 20 pengje janë ende gjallë dhe 38 të vdekur. Do t'i kthejmë të gjithë”, tha ai.

Kryeministri Netanjahu theksoi se, ndryshe nga dyshimet e hershme, pengjet janë liruar.

“Në fillim të luftës, disa thanë se nuk do të merrnim asnjë peng mbrapsht. Unë mendova ndryshe. Veprova ndryshe. Dhe kjo rrugë e ka provuar veten. Nëse ka një mundësi për një armëpushim të përkohshëm dhe për të sjellë më shumë pengje, ne jemi gati për këtë. Vetëm një armëpushim të përkohshëm”, tha ai.

“Pasi e shkatërruam armikun në jug, i rezistuam presionit të madh ndërkombëtar për t'i dhënë fund luftës, si dhe presionit të konsiderueshëm të brendshëm.

Ne iu kundërpërgjigjëm të gjithave.

Hymë në Rafah, pushtuam Rrugën e Filadelfias, premë linjën e furnizimit të Hamasit dhe vetëm pastaj u kthyem në Liban.

Në operacionin më të guximshëm me bipe në historinë e luftës, eliminuam mijëra terroristë dhe pjesën më të madhe të komandës së lartë të Hezbollahut.

Shkatërruam shumicën dërrmuese të fshatrave të tyre terroriste dhe eliminuam kërcënimin e pushtimit për komunitetet veriore.

Ne po e zbatojmë këtë armëpushim me vendosmëri. Ushtria e Izraelit (IDF) e bën këtë në mënyrë të jashtëzakonshme.

Operacionet tona në Liban çuan në rënien e regjimit të Asadit. Ne u kemi dhënë goditje të rënda Huthëve në Jemen dhe ende nuk e kemi thënë fjalën tonë të fundit.

Ne goditëm infrastrukturën terroriste iraniane, por Irani mbetet një kërcënim shumë serioz për Izraelin.

Ne jemi në koordinim të plotë me ShBA-ës, në komunikim të vazhdueshëm.

Shpresojmë që ata të arrijnë një marrëveshje, një marrëveshje që do ta pengonte Iranin të pasurojë uraniumin.

Nëse kjo ndodh, sigurisht, ne do ta mirëpresim. Por pavarësisht kësaj, Izraeli rezervon të drejtën për të mbrojtur veten kundër një regjimi që kërcënon shfarosjen tonë”, tha ai.

Kryeministri Netanjahu përsëriti se Operacioni ushtarak i koduar “Qerret e Gideonit” synon të përfundojë punën.

“Tre ditë më parë, unë dhe kabineti urdhëruam një fazë të re në këtë luftë rilindjeje.

Po u japim goditje masive bastioneve të mbetura të Hamasit në Gaza.

Pyetini banorët e komuniteteve kufitare të Gazës, shtëpitë e tyre dridhen, jo nga raketat e Hamasit, por nga fuqia masive e zjarrit e IDF-së.

Po marrim gjithnjë e më shumë territor dhe po e pastrojmë nga Hamasi. Deri në fund të këtij procesi, e gjithë Gaza do të jetë nën kontrollin izraelit dhe Hamasi do të mposhtet plotësisht.

Për të ruajtur lirinë tonë operacionale dhe për t'u lejuar aleatëve tanë të na mbështesin, duhet të parandalojmë një krizë humanitare”, tha ai, duke shpjeguar planin SHBA-Izrael për të ofruar ndihmë për banorët e Gazës.

Plani Humanitar Trefazor. 👇👇👇

“Dëgjoj nga miqtë e vërtetë të Izraelit: ne po ju mbështesim, po ju dërgojmë armë, po ju bëjmë thirrje të eliminoni këta përbindësha, por një gjë që nuk do ta pranojmë është një krizë humanitare në Gaza.

Në të njëjtën kohë, të gjithë e dimë se Hamasi plaçkit pjesën më të madhe të ndihmës dhe shet pjesën tjetër me çmime të larta për të rekrutuar terroristë.

Pra, për t'i mohuar Hamasit aksesin në ndihmë humanitare, ne kemi zhvilluar një plan alternativ me ShBA-ës, një program bazë shpërndarjeje ushqimesh që nuk do të arrijë te Hamasi.

Plani përfshin tre faza: 👇👇👇

1- Faza e parë - shpërndarja e menjëhershme e furnizimeve bazë ushqimore për të parandaluar një krizë humanitare dhe për të lejuar vazhdimin e luftimeve.

2- Faza e dytë - duke filluar në ditët në vijim, hapja e pikave të shpërndarjes së ushqimit të drejtuara nga kompanitë amerikane.

3- Faza e tretë - gjatë marrjes së Gazës, krijimi i një zone sterile në Rripin jugor të lirë nga Hamasi, ku banorët e Gazës do të marrin ndihmë të plotë humanitare”.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit