GJYKATA KUSHTETUESE E TURQISË KUMTOI SE AUTORITETET SHKELËN TË DREJTAT E PRIFTËRINJVE ORTODOKSË GREKË.

Statuja në hyrje të Gjykatës Kushtetuese në Ankara, Turqi.

Ankara, Turqi | Gjykata Kushtetuese e Turqisë vendosi në shtator se dy priftërinjve ortodoksë grekë u ndaluan në mënyrë të paligjshme të shërbenin në një bord fondacioni, në kundërshtim me të drejtën e tyre kushtetuese për lirinë e organizimit, sipas Qendrës së Stokholmit për Lirinë (SCF), e cila, citon faqen e lajmeve Agos.

“Atanas (Athanasios) Mamasis dhe Corc (George) Kasapoglu, të lidhur me Patriarkanën Ekumenike të Stambollit, u zgjodhën në bordin e Fondacionit të Kishës Ortodokse Greke Samatya Aya Analipsis në vitin 2011, por Drejtoria e Përgjithshme e Fondacioneve (VGM), një agjenci e qeverisë turke që nuk ishte përgjegjëse për zgjedhjen e tyre, rolet fetare i cilësoi si të papajtueshme me anëtarësimin në bordin”, thuhet në raport.

“Priftërinjtë e kundërshtuan vendimin, duke argumentuar se Rregullorja e Fondacioneve të vitit 2008 nuk i ndalonte klerikët të shërbenin në bordet e fondacioneve dhe paraqitën, nëpërmjet avokatit të tyre, një kërkesë në Gjykatën Kushtetuese më 24 tetor 2019”, raportoi SCF, duke cituar Agos.

“Më 18 shtator 2024, gjykata konstatoi se pasiguria e gjatë ligjore i privoi kërkuesit nga e drejta e tyre për lirinë e organizimit, e mbrojtur sipas nenit 33 të Kushtetutës së Turqisë”, sipas vendimit të botuar në Gazetën e Qeverisë Turke.

Gjykata i dha secilit aplikant 30000 lira turke (847 dollarë) si dëmshpërblim jopasuror dhe urdhëroi që një kopje e vendimit t'i dërgohej VGM-së dhe Ministrisë së Drejtësisë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit