___.png)
GJYKATA E APELIT ZBARDHI PJESËRISHT VENDIMIN NË LIDHJE ME LOGON DHE VULËN E PDSH-së | KRYETARI BASHA KA 5 DITË KOHË T'I DREJTOHET GJYKATËS SË LARTË.
- Agjencia Telegrafike Vox
- Jun 11, 2024
- 2 min read
Tiranë, Shqipëri | Gjykata e Apelit njoftoi për shoqërinë vendimin që mori në lidhje me mosmarrëveshjet për zotërimin e logos dhe të vulës së Partisë Demokratike të Shqipërisë.
Trupa gjykuese, e përbërë nga gjyqtaret Alma Ahmeti, Elona Toro dhe Iliba Bezati refuzoi ankimimin e përfaqësuesve ligjorë të kryetarit të PDSH-së Lulzim Basha, me anë të të cilit ata kërkonin prishje të vendimit të gjyqtarit Agron Zhukri, i cili në mars të vitit 2022 njohu grupin e Rithemelimit si përfaqësues ligjor të Partisë Demokratike.
Gjykata nuk ka pranuar ankimin e deputetit Enkelejd Alibeaj duke lënë në fuqi vendimin e gjykatës së Shkallës së Parë, sipas të cilit, vula dhe logoja e PDSH-së i takon deputetit nën hetim penal Sali Berisha.
Në njoftimin e Gjykatës së Apelit thuhet gjithashtu se pala humbëse e gjyqit ka 5 ditë kohë për të kundërshtuar vendimin dhe për t'iu drejtuar Gjykatës së Lartë - duke filluar nga dita e nesërme.
Njoftim | Në vijim të informacioneve të dhëna më herët dhe në respekt të së drejtës së publikut për t’u informuar mbi çështjet me interes publik dhe posaçërisht proceset mbi kërkesat për regjistrim në regjistrin e partive politike për subjektin Partia Demokratike e Shqipërisë, ju njoftojmë si më poshtë:
Partia Demokratike e Shqipërisë, përfaqësuar nga Komisioni i Përkohshëm i Rithemelimit, ka ushtruar rekurs ndaj vendimit nr. 44, datë 03.03.2023 të Gjykatës së Apelit të Juridiksionit të Përgjithshëm dhe ka kërkuar:
- Prishjen e vendimit nr. 44, datë 03.03.2023 të Gjykatës së Apelit të Juridiksionit të Përgjithshëm.
-Deklarimin si të papranueshëm të ankimit paraqitur nga deputeti Enkelejd Alibeaj ndaj vendimit nr. 3, datë 25.03.2022 të Gjykatës së Rrethit Gjyqësor Tiranë.
-Lënien në fuqi të vendimit nr. 3, datë 25.03.2022 të Gjykatës së Rrethit Gjyqësor Tiranë.
Kolegji Civil i Gjykatës së Lartë me vendimin nr. 786, datë 27.12.2023 ka vendosur:
Prishjen e vendimit nr. 44, datë 03.03.2023 të Gjykatës së Apelit të Juridiksionit të Përgjithshëm dhe dërgimin e çështjes për rishqyrtim pranë asaj gjykate, me tjetër trup gjykues.
Në datë 11.06.2024 gjatë rigjykimit të çështjes në gjykatën e apelit, përfaqësuesi me autorizim av.Ivi Kaso i Partisë Demokratike të Shqipërisë, “Komisioni i Përkohshëm i Rithemelimit” kërkoi:
– “Mospranimin e ankimit të ushtruar ndaj vendimit nr. 3, datë 25.03.2022 të Gjykatës së Rrethit Gjyqësor Tiranë”.
Përfaqësuesit ligjor av. Indrit Sefa dhe av. Rezart Kthupi, të Partisë Demokratike të Shqipërisë e përfaqësuar nga z. Enkelejd Alibeaj, kërkoi:
“Prishjen e Vendimit me nr. 3, datë 25.03.2022 të Gjykatës së Rrethit Gjyqësor Tiranë, duke vendosur: Pushimin e gjykimit, pasi nuk legjitimohen”.
Në përfundim të gjykimit, sot më datë 11.06.2024, Gjykata e Apelit të Juridiksionit të Përgjithshëm, e përbërë nga trupi gjykues me Relatore Gjyqtare znj. Alma Ahmeti dhe anëtare znj. Elona Toro dhe znj. Iliba Bezati, vendosi:
-Mospranimin e ankimit të ushtruar kundër vendimit Nr.3, datë 25.03.2022 të Gjykatës së Rrethit Gjyqësor Tiranë.
-Kundër këtij vendimit mund të bëhet rekurs i veçantë në Gjykatën e Lartë brenda 5 ditëve duke filluar ky afat nga dita e nesërme e komunikimit të vendimit.
-Vendimi i arsyetuar do t’i komunikohet palëve.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
