GJENERAL-LEJTANANT ANDREI MORDVIÇEV U EMËRUA SHEF I FORCAVE TOKËSORE | MBAN DEKORATËN “HERO I FEDERATËS RUSE” (NDERI MË I LARTË I RUSISË).

Presidenti rus Vladimir Putin, në qendër, ecën pas Paradës së Fitores që shënon 70-vjetorin e disfatës së nazistëve në Luftën e Dytë Botërore, në Sheshin e Kuq në Moskë, Rusi, të shtunën, 9 maj 2015 || Në të majtë është Ministri i Mbrojtjes Sergei Shoigu ndërsa në të djathtë është Komandanti i Forcave Tokësore të Ushtrisë Ruse Oleg Saliukov.

Moskë, Federata Ruse | Gjeneral-lejtanant Andrei Mordviçev, i cili, u dallua në beteja të rëndësishme në luftën e Ukrainës, është emëruar komandant i Forcave Tokësore të Federatës Ruse.

Gjeneral-lejtanant Andrei Mordviçev.

I lindur në vitin 1976 në Kazakistanin e atëhershëm sovjetik, z. Mordviçev u dekorua vitin e kaluar si “Hero i Federatës Ruse”, nderi më i lartë i Rusisë.

Ai kishte shërbyer si kreu i Distriktit Ushtarak Qendror, ndërsa në pranverën e vitit 2022 ai udhëhoqi operacionet që çuan në dorëzimin e forcave ukrainase që po i rezistonin uzinës së çelikut Azovstal, pas një rrethimi prej afërsisht 80 ditësh, në Mariupol, në Ukrainën jugore.

Në vitin 2024, ai udhëhoqi trupat ruse që pushtuan qytetin strategjikisht të rëndësishëm të Avdiivkës në rajonin e Donetskut, si dhe zona të tjera të rëndësishme.

Z. Mordviçev pason në këtë detyrë gjeneralin 69-vjeçar Oleg Saliukov, i cili, u emërua zëvendëssekretar i Këshillit të Sigurisë së Federatës Ruse, një organ këshillimor që mblidhet rregullisht nën drejtimin e presidentit Vladimir Putin për çështje të sigurisë kombëtare.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit