___.png)
Jeruzalem, Izrael | “Kryeministri izraelit Benjamin Netanjahu synon të sabotojë marrëveshjen e armëpushimit në Gaza”, raporton gazeta izraelite “Haaretz”, duke cituar burime që përsëritën se delegacioni izraelit në Katar nuk do të ndjekë fazën e dytë të marrëveshjes.
“Është një shfaqje - tha një burim - kryeministri Netanjahu po sinjalizon shumë qartë se ai nuk dëshiron të kalojë në fazën tjetër.
Ai po dërgon një ekip pa mandat dhe pa aftësi për të bërë asgjë”.
I njëjti burim beson se imazhet e pengjeve të liruar e kanë dëmtuar ndjeshëm Netanyahun në sondazhe.
“Votuesit e krahut të djathtë shohin se ne nuk e kemi mundur Hamasin dhe militantët e tij ende po ecin me armë. Shenjat në platformat në Gaza tallen me Netanjahun dhe i referohen sloganit të tij 'fitore totale’”, shtoi burimi, duke shtuar se kryeministri Netanjahu e di se nuk ka qeveri nëse vazhdon me marrëveshjen.
“Sapo Hamasi të kuptojë se nuk do të ketë fazë të dytë, mund të mos e përfundojë të parën”, vuri në dukje burimi, duke shtuar se Hamasi nuk është budalla.
Ata shohin politizimin e negociatave, emërimin e besnikëve të kryeministrit Netanjahu, Ron Dermer dhe Gal Hirsch, dhe deklaratat e z. Smotriç (Smotrich) dhe ministrave të tjerë të krahut të djathtë që kërcënojnë të rrëzojnë qeverinë. Ata do të kuptojnë se ku po shkon kjo.
Një zyrtar i lartë izraelit kishte sqaruar tashmë dje se ekipi izraelit në Doha do të diskutonte vetëm detaje teknike.
Zyrtarët izraelitë nuk pranuan të specifikonin se çfarë përfshinin këto detaje.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments