EKSPERTËT PARALAJMËROJNË SE FRONTI I UKRAINËS MUND TË SHEMBET NDËRSA PËRPARIMET E RUSISË PËRSHPEJTOHEN.

Londër, Britani e Madhe | Vendimi i presidentit amerikan Baidn (Biden) për të ofruar mina kundër personit në Ukrainë dhe për të lejuar përdorimin e raketave me rreze të gjatë veprimi në territorin rus, vjen pasi ushtria ruse po përshpejton arritjet e saj përgjatë vijës së frontit.

Të dhënat nga Instituti për Studimin e Luftës (ISW) tregojnë se Rusia ka fituar pothuajse gjashtë herë më shumë territor në vitin 2024 sesa në vitin 2023 dhe po përparon drejt qendrave kryesore logjistike të Ukrainës në rajonin lindor të Donbasit.

Ndërkohë, inkursioni i befasishëm i Ukrainës në rajonin e Kurskut të Rusisë po lëkundet.

Trupat ruse e kanë shtyrë mbrapsht ofensivën e Kievit. Ekspertët kanë vënë në pikëpyetje suksesin e ofensivës, duke e quajtur atë një katastrofë strategjike duke pasur parasysh mungesën e fuqisë punëtore me të cilën përballet Ukraina.

Këto zhvillime vijnë në një kohë pasigurie të shtuar me një administratë të dytë të presidentit të zgjedhur Danlld Tramp (Donald Trump) në afërsi.

Presidenti i zgjedhur i SHBA-së është zotuar se do ta mbyllë luftën kur të marrë detyrën në janar, me disa që kanë frikë se ai mund të shkurtojë ndihmën e ardhshme ushtarake për Ukrainën.

Rusia përparon në Ukrainën lindore: Në muajt e parë të luftës, vija e frontit lëvizi shpejt, me Rusinë që fitoi terren shpejt përpara se të shtyhej nga një kundërofensivë ukrainase.

Por në vitin 2023 asnjëra palë nuk bëri ndonjë përfitim të madh - me konfliktin që rrëshqiti kryesisht në një ngërç.

Por shifrat e reja të ISW sugjerojnë se historia në vitin 2024 është më e favorshme për Rusinë. ISW e bazon analizën e tij në pamjet e konfirmuara të mediave sociale dhe raportet e lëvizjeve të trupave.

Të dhënat e ISW-së tregojnë se forcat e Moskës kanë kapur rreth 2700 km katrorë të territorit ukrainas deri më tani këtë vit, krahasuar me vetëm 465 km katrorë në të gjithë vitin 2023, një rritje gati gjashtëfish.

Dr. Marina Miron, një studiuese e mbrojtjes në Kings College në Londër, sugjeroi se ekzistonte mundësia që fronti lindor i Ukrainës mund të shembet nëse Rusia vazhdon të përparojë me ritmin.

Më shumë se 1000 km katrorë u morën midis 1 shtatorit dhe 3 nëntorit, duke sugjeruar që shtytja u përshpejtua muajt e fundit.

Dy zona që mbajnë peshën kryesore të këtyre përparimeve janë Kupiansk-u në rajonin e Kharkiv-it dhe Kurakhove, një gur hapi drejt qendrës kryesore logjistike të Pokrovsk-ut në rajonin e Donetsk-ut.

Kupiansk-u dhe zonat në lindje të lumit Oskil-it u çliruan në ofensivën e Kharkiv-it të vitit 2022, por Rusia e ka rimarrë në mënyrë progresive zonën e fundit.

Në një përditësim të fundit të inteligjencës, Ministria e Mbrojtjes e Mbretërisë së Bashkuar tha se forcat ruse po përpiqeshin të depërtonin në periferinë verilindore të qytetit.

Pamjet e postuara më 13 nëntor dhe të verifikuara nga enti mediatik britanik BBC janë në përputhje me këtë analizë.

Ndërsa këto raporte nuk përkthehen domosdoshmërisht në kontrollin e një zone, është tregues se sa e shtrirë është bërë linja mbrojtëse e Ukrainës.

Diku tjetër, që nga rimarrja e qytetit të Vuhledar-it në tetor - një pozicion i ngritur që qëndron mbi linjat kryesore të furnizimit dhe për të cilin Moska kaloi dy vjet duke luftuar - Rusia ka hedhur burime në Kurakhove.

Forcat e Ukrainës që mbrojnë qytetin deri më tani kanë zmbrapsur sulmet në jug dhe në lindje.

Por vija e frontit zvarritet gjithnjë e më shumë, me Rusinë që kërcënon gjithashtu të rrethojë mbrojtësit nga veriu dhe perëndimi.

Kolonel Jevgeni Sasiko (Yevgeny Sasyko), një ish-kre i komunikimeve strategjike me shtabin e përgjithshëm të Ukrainës, tha se Rusia vendos nofulla të fuqishme rreth krahëve të një qyteti që ngadalë i bluan mbrojtjen derisa ato të shemben.

Pamjet nga qyteti të verifikuara nga enti mediatik britanik  BBC treguan shkatërrime masive, me ndërtesa banimi të dëmtuara rëndë.

ISW përfundon se Moska tani ka një total prej 110649 km katrorë në Ukrainë.

Për krahasim, forcat ukrainase kapën pak më shumë se 1171 km katrorë në muajin e parë të inkursionit të saj në Kursk - megjithëse forcat ruse tani kanë rimarrë gati gjysmën e këtij territori.

Pavarësisht fitimeve të saj territoriale, përparimi i Rusisë ka pasur një kosto të madhe.

Një analizë e kryer nga BBC Russian konfirmoi se të paktën 78329 trupa janë vrarë që kur Rusia nisi pushtimin e saj në shkallë të plotë në muajin shkurt të vitit 2022, me humbjet e Moskës nga shtatori në nëntor të këtij viti më shumë se një herë e gjysmë më të mëdha se sa të njëjtën periudhë të vitit 2023.

Humbjet shtohen nga qasja e mullirit të mishit që thuhet se favorizohet nga komandantët rusë - duke përshkruar valët e rekrutëve të hedhura drejt pozicioneve ukrainase në një përpjekje për të shterur trupat.

Pavarësisht përparimeve ruse, disa ekspertë kanë vërejtur se shpejtësia aktuale e ofensivës është ende e ngadaltë.

Z. David Handelman, një analist ushtarak, sugjeroi se trupat ukrainase në lindje po tërhiqeshin ngadalë për të ruajtur fuqinë punëtore dhe burimet, në vend që të vuanin nga një kolaps më i gjerë.

Gambiti i Kursk-ut: Ukraina nisi inkursionin e saj tronditës në rajonin Kursk-ut të Rusisë në muajin gusht.

Është e paqartë pse Rusisë iu desh kaq shumë kohë për t'iu përgjigjur operacionit, i cili, pa që trupat e Kievit të fitonin shpejt kontrollin mbi një numër komunitetesh kufitare.

Dr. Miron sugjeroi se ndërsa Kremlini do të vuante një kosto politike të brendshme për aq kohë sa do të vazhdonte inkursioni, shtabi i përgjithshëm i Rusisë kishte qenë i prirur t'i mbante forcat e Ukrainës të lidhura në Kursk ndërsa forcat e tij kishin fituar diku tjetër përgjatë vijës së frontit.

Por Moska tani është e qartë se synon të rikuperojë territorin e humbur në tokën e saj. Rreth 50000 trupa janë vendosur në rajon.

Videot e verifikuara nga rajoni i Kursk-ut tregojnë se po zhvillohen luftime të ashpra - dhe se Rusia po pëson humbje të konsiderueshme në aspektin e fuqisë punëtore dhe pajisjeve. Por të dhënat tregojnë qartë se kontrolli i Ukrainës mbi rajonin po tkurret.

“Që nga fillimi i tetorit, kundërsulmet ruse kanë rifituar një territor me vlerë rreth 593 km katrorë në rajonin kufitar”, treguan shifrat e ISW.

Inkursioni i Kursk-ut ishte fillimisht një ndihmë e madhe për Ukrainën për sa i përket moralit në një kohë pengesash serioze dhe guximi i operacionit ishte një kujtesë e aftësisë së saj për të befasuar dhe dëmtuar armikun e saj.

Por Dr. Miron tha se ndërsa inkursioni në Kursk ishte një moment shkëlqimi taktik, ai gjithashtu ka qenë një katastrofë strategjike për Ukrainën.

“E gjithë ideja ishte që ndoshta të fitohej një levë politike në negociatat e mundshme, por ushtarakisht të tërhiqeshin forcat ruse nga Donbasi për të çliruar Kursk-un. Dhe ajo që ne po shohim në vend të kësaj është se njësitë ukrainase janë të lidhura atje”, tha ajo.

Disa nga njësitë më me përvojë dhe efektive të Kievit dihet se po luftojnë në Kursk.

Në ofensivë janë përfshirë edhe njësitë e mekanizuara të pajisura me armaturë moderne perëndimore.

Udhëheqësit ukrainas kishin lënë të kuptohet se ata shpresonin se inkursioni do ta detyronte Moskën të ridrejtonte disa nga forcat e saj nga Ukraina lindore, duke ngadalësuar përparimin rus atje.

Në vend të kësaj, ekspertët thonë se shumica e përforcimeve u zhvendosën në Kursk nga pjesët në Ukrainë ku luftimet nuk janë aq intensive.

“Sipas ushtarëve ukrainas nga pjesë të ndryshme të frontit, trupat ruse që përforconin Kursk-un u tërhoqën kryesisht nga Kherson-i dhe Zaporizhzhia”, tha për entin mediatik BBC z. Juri Klaviliër (Yurri Clavilier), një analist tokësor në Institutin Ndërkombëtar për Studime Strategjike.

“Luftat atje nuk janë aq intensive sa në Lindje. Disa njësi ruse që sulmonin Kharkiv-in u ridrejtuan gjithashtu në Kursk pasi Ukraina arriti të ndalonte sulmin rus atje”, shtoi ai.

Rëndësia e territorit për të dyja palët është forca që i jep pozicionit të tyre në çdo negociatë të mundshme.

Megjithëse nuk janë diskutuar asnjë negociatë paqeje, presidenti i zgjedhur i SHBA-së, Tramp ka pohuar se mund t'i japë fund luftës brenda 24 orëve, pa thënë saktësisht se si.

Frika vazhdon në Ukrainë se z. Tramp mund të shkurtojë ndihmën ushtarake si një mjet për të detyruar Kievin në tryezë.

Presidenti i Ukrainës Volodimir Zelenski i tha entit mediatik amerikan Faks Njuz (Fox News) të marten se: “Unë mendoj se ne do ta humbim luftën nëse shkurtimet shtyhen”.

“Ne kemi prodhimin tonë, por nuk mjafton të mbizotërojmë dhe mendoj se nuk mjafton për të mbijetuar”, tha ai.

Të martën, Ukraina lëshoi ​​për herë të parë raketa me rreze të gjatë veprimi të furnizuar nga SHBA në Rusi - një ditë pasi Uashingtoni i dha lejen për ta bërë këtë.

Dr. Miron i tha entit mediatik britanik BBC-së se përparimi i Rusisë u ka dhënë atyre një pozitë më të fortë negociuese ndërsa ekipi i ri i politikës së jashtme të z. Tramp përgatitet të marrë detyrën.

“Ajo që ata po kontrollojnë tani, u jep atyre një avantazh të caktuar”, tha ajo.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit