___.png)
Baku, Azarbajxhan | Vendet e pasura mund të rrisin fondet për të luftuar ndryshimet klimatike për vendet në zhvillim nga 100 miliardë dollarë në vit - një shifër e përcaktuar nga Marrëveshja e Parisit e 2015 - në 250 miliardë $.
Kjo është ajo që del nga një draft i ri i propozuar nga presidenca e Azerbajxhanit të Konferencës së 29-të të Kombeve të Bashkuara për Ndryshimet Klimatike (COP29), e cila, u zhvillua në Baku.
Edhe pse COP29 zyrtarisht mbyllet sot, negociatat për deklaratën përfundimtare nuk kanë përfunduar për shkak të divergjencave midis veriut dhe jugut të botës në temën e financave të gjelbra.
250 miliardë dollarët në vit të propozuara si një kompromis nga presidenca e Azerbajxhanit janë më pak se një e katërta e shumës që vendet në zhvillim e konsiderojnë të nevojshme për të luftuar ndryshimet klimatike.
Për më tepër, këto vende kërkojnë që një pjesë e madhe e financimit të jetë e pakthyeshme dhe të mos shoqërohet me vendosjen e kufizimeve për zbutjen e emetimeve.
Nga ana tjetër, të ashtuquajturat vende donatore bëjnë thirrje për realizëm dhe theksojnë se kërkesat janë sasiorisht të tepërta.
Kombet e pasura kërkojnë gjithashtu miratimin e kufizimeve zbutëse.
Projektmarrëveshja e paraqitur sot është tashmë e dyta dhe zëvendëskryeministri i Azerbajxhanit, Yalchin Rafiyev, ende shpreson se konvergjenca mund të gjendet në një shifër më të lartë se 250 miliardë.
Mbetet të shihet se sa kohë do të duhet për të arritur një marrëveshje.
Edicionet e mëparshme të Konferencës së OKB-së për Ndryshimet Klimatike shpesh kanë tejkaluar afatet e pritshme.
Marrëveshja e Parisit e vitit 2015 përmban një zotim që temperaturat mesatare globale nuk do të rriten me më shumë se 1.5 gradë Celsius deri në fund të shekullit.
Sipas Kombeve të Bashkuara, tashmë jemi 1.3 gradë celsius mbi mesataren.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments